Sormena Haur Hezkuntzan: Umeek 100 hizkuntza baino gehiago menperatzen dituzte!

Gaurko honetan, Reggio Emiliaren filosofia aurkeztea bururatu zait. Izan ere, Italian sortu zen filosofia honetan, sormena sustatzeari izugarrizko garrantzia ematen diote. Egia esan, adimen mota guztiak garatzeari garrantzi bera ematen diote, diotenez, pertsona osatua izateko, adimen mota guztien beharra dugu, beraz, hauen hierarkizazioa alde batera utziz, ume guztiei bide ezberdinak zabaltzen dizkiete. Modu honetan, etorkizunean izango dituzten gatazkei aurre egiteko kapazagoak izango dira.

Haien hezkuntza bideratzeko, leku seguru eta baliabidez betetakoa erabiltzen dute, non umeek askatasunez sortu eta ezagutzak barneratzen dituzten. Umeek ikasten duten bitartean zoriontsuak izatea helburutzat dute, hau da, egiten dutenarekin disfrutatzea. Azken finean, esperientzien bidez ikastea.

Bestalde, erlazio sozialei izugarrizko garrantzia ematen diote, izan ere, ume bakoitzaren erritmoa zein ikasteko era errespetatuz, guztiok guztiongandik ikastea bideratzen dute, interakzio ugarien bitartez. Filosofia honetan, ezinbestekoa da eskola guztiona dela sentitzea (gurasoena, ikasleena, irakasleena, boluntarioak…), modu honetan, eskolaren garapenean elkarrekin lan egitea errazagoa bilakatuko da eta umeen hezkuntza aldiz, askoz ere aberatsagoa.

Amaitzeko, Reggio Emilian grabatutako bideo bat erakutsi nahi dizuet, “Umeen 100 hizkuntza ezberdinak”. Filosofia honek dioenez, umeek hitzezko hizkuntza bereganatu baino lehen 100 hizkuntza ezberdin baino gehiago menperatzen dituzte, eta hizkuntza hauei esker, haien sormena zein gaitasun soziala eta kognitiboa bereganatzen doaz. Helduok, haurren hizkuntza gutxi batzuk berehala antzematen ditugu, baina zenbat hizkuntz ez ditugu antzematen?

Reggio Emilia eskoletan, komunikazio eta pentsamendu mota ezberdinak baloratzen dituzte, beraz, honen inguruan kuriositatea badaukazue, begira ezazue bideo hau eta zuzenean ikuzi ezazue umeek dituzten gaitasun itzelak. Benetan merezi du ikusteak, izugarri polita baita!