Sormena neurtzeko ariketa kuriosoa!

Egia da, oraindik, sormena neurtzeko ez dugula tresnarik asmatu eta ziur aski, etorkizunean bada ere, horrelako makina bat sortzea zaila izango zaigu. Horregatik, horri itxaroten diogun bitartean, gure haurrekin ariketa dibertigarri batzuk egin ditzakegu. Hala ere, azpimarratu beharrekoa da ariketa hauek ez dutela pertsona baten sormena osotasunean neurtzen, baizik eta sormenaren atal bat soilik.

Ariketa honetan datza: lehenengo eta behin, jolastuko duten guztientzako, biribilez betetako horri bat bananduko dugu. Ondoren, guztiei azalduko diegu nola biribil bakoitzean datorkiona burura marraztu behar duten, hau da, biribil bakoitzean objektu ezberdin bat marraztu behar dute. Adibidez, gurpila, erlojua, aurpegia… azken finean, bakoitzari burura datorkiona. Ariketa hau burutzeko, denbora zehaztea ezinbestekoa da, horrela irudimenaren habiadura ere neurtzen da. Beraz, taldearen adinaren arabera denbora bat ala bestea ezarriko dugu.

Proposatuko dudan ariketa hau, adin guztietako pertsonek egin dezakete eta taldean egiten bada, hobeto! Modu honetan, ariketa amaitzean, bakoitzak marraztu duena ikusiko dugu, guztiok guztiongandik ikastea sustatuz.

Bestalde, orririk edo arkatzik ez izatekotan, antzeko ariketa bat egin daiteke. Hau da, inguruan daukagun objektu bat hartu eta zertarako erabili daitekeen esan. Adibidez, zapata bat hartu dezakegu eta besteok erabilera ezberdinak esan; telefonoa, marteilua, edalontzia, mikrofonoa… berriro ere, bakoitzari burura datorkiona.